Միջուկային և ռադիացիոն անվտանգության գիտատեխնիկական կենտրոնի և ՀՀ միջուկային անվտանգության կարգավորման կոմիտեի ներկայացուցիչները Սլովակիայի Տրնավա քաղաքում մասնակցեցին տեխնիկական հանդիպմանը։ Այն կազմակերպվել էր ԵՄ աջակցությամբ իրականացվող ծրագրի շրջանակում։
Հայ մասնագետները հանդիպումներ և քննարկումներ են ունեցել Սլովակիայի միջուկային կարգավորող մարմնի՝ UJD, ինչպես նաև միջուկային ոլորտի առանցքային կազմակերպությունների՝ Vuje գիտատեխնիկական կենտրոնի, և JAVYS՝ ռադիոակտիվ թափոնների կառավարման մասնագիտացած ընկերության ներկայացուցիչների հետ։ Քննարկումների ընթացքում հայկական կողմին ներկայացվել է ռադիոակտիվ թափոնների կառավարման և միջուկային տեղակայանքների շահագործումից հանման, ինչպես նաև ԵՄ Դիրեկտիվներին և WENRA-ի անվտանգության ռեֆերենտային մակարդակներին ներքին օրենսդրության համապատասխանեցման Սլովակիայի փորձը։ Հարկ է նշել, որ Հայաստանն ու Սլովակիան շահագործում են նույն ՎՎԷՌ տեսակի միջուկային ռեակտորներ։
Այսպիսի հանդիպումները կարևոր են Հայաստանի համար։ Հայաստանի և ԵՄ միջև ստորագրված Համապարփակ և ընդլայնված գործընկերության համաձայնագրի(CEPA) համատեքստում ՀՀ օրենսդրությունը պետք է համապատասխանեցվի ԵՄ կարգավորումներին։
Միջուկային և ռադիոակտիվ անվտանգության գիտատեխնիկական կենտրոնը ակտիվորեն մասնակցում է ՀՀ օրենսդրական և կարգավորող փաստաթղթերի ներդաշնակեցման գործընթացին։ Կենտրոնը մշակել է հետևյալ փաստաթղթերի նախագծերը՝ «Ռադիոակտիվ թափոնների անվտանգ կառավարման պահանջները», «Ճառագայթային անվտանգության և պաշտպանության պահանջները», «Ռադիոակտիվ թափոնների պետական գրանցման կարգը», ինչպես նաև «Ատոմային էներգիայի մասին» ՀՀ օրենքի նոր նախագիծը, որը գտնվում է ամփոփման փուլում։
