Միջուկային և ռադիացիոն անվտանգության գիտատեխնիկական կենտրոնի մասնագետներ Սաթինե Վարդանյանն ու Կարեն Հարոյանը մասնակցեցին Վաշինգտոնում կայացած Կարգավորող մարմինների տեղեկատվական 37-րդ տարեկան համաժողովին (37th Annual Regulatory Information Conference):
Համաժողովից զատ, մեր մասնագետները մի շարք հանդիպումներ ու քննարկումներ ունեցան, այդ թվում՝ ԱՄՆ միջուկային էներգիայի կարգավորող հանձնաժողովի (Nuclear Regulatory Commission) նորանշանակ նախագահ Դևիդ Րայթի, հանձնակատարներ Քրիստոֆեր Հանսոնի ու Մեթյու Մարզանոյի հետ։
Քննարկման հիմնական թեմաներն էին Հայաստանի ԱԷԿ 2-րդ էներգաբլոկի շահագործման ժամկետի երկարացման, հետագայում ՀԱԷԿ-ը շահագործումից հանելու, աշխատած միջուկային վառելիքի կառավարման, ՀՀ-ում նոր միջուկային ռեակտորների կառուցման ծրագրերը, ինչպես նաև Կենտրոնի անձնակազմի վերապատրաստման ու կարողությունների ուժեղացման անհրաժեշտությունը: Հայ մասնագետները ներկայացրեցին Հայաստանի միջուկային անվտանգության ներկայիս վիճակն ու առկա մարտահրավերները, հնարավոր լուծումները։
ԱՄՆ Միջուկային կարգավորող հանձնաժողովի նախագահ Դևիդ Րայթն ու իր գործընկերները պատրաստակամություն հայտնեցին շարունակելու աջակցել Հայաստանի գործընկեր կազմակերպություններին, մասնավորապես միջուկային անվտանգության և պաշտպանություն ոլորտում փորձի փոխանակման հարցերում: Քննարկվեցին այն միջոցառումները, որոնք կօգնեն հաղթահարել ներկա խնդիրները, վերապատրաստել նոր անձնակազմը, արդիականացնել գիտատեխնիկական կենտրոնի կարողությունները, կատարելագործել կարգավորող պահանջները: Բացի այդ, հանձնաժողովի անդամները հրավիրեցին հայ մասնագետներին մասնակցելու փոքր մոդուլային ռեակտորների նախագծման փաստաթղթերի վերլուծությանը:
Սաթինե Վարդանյանն ու Կարեն Հարոյանը հանդիպեցին նաև Բրուկհեյվենի Ազգային Լաբորատորիայի (Brookhaven National Laboratory) և Advanced Systems Technology and Management, Inc. կազմակերպության ներկայացուցիչների հետ։ Քննարկվեցին հետագա համագործակցության, Կենտրոնի անձնակազմի վերապատրաստման և զարգացման հնարավորությունները:
Միջուկային և ռադիացիոն անվտանգության գիտատեխնիկական կենտրոնը խիստ կարևորում է այսպիսի հանդիպումներն ու քննարկումները, քանի որ դրանք նպաստում են միջազգային համագործակցության ամրապնդմանն ու ՀՀ-ում միջուկային էներգիայի կարգավորող հնարավորությունների զարգացմանը։
Այլ նորություններ
