Միջուկային և ռադիացիոն անվտանգության գիտատեխնիկական կենտրոնը հուլիսի 8-10-ը անցկացրեց մասնագիտական որակավորման բարձրացման դասընթաց՝ «Ճառագայթային պաշտպանություն և ռադիոակտիվ աղբյուրների անվտանգ օգտագործում» թեմայով։ Դասընթացին մասնակցում էին Գազպրոմ Արմենիա ՓԲԸ Ինժեներատեխնիկական կենտրոն մասնաճյուղի Դաշտային փորձարարական լաբորատորիայի 9 աշխատակիցներ։
Մասնակիցները ծանոթացան ռադիացիոն անվտանգության հիմնարար պահանջներին, ռադիոակտիվ նյութերի անվտանգ օգտագործման կանոններին, ճառագայթային դոզաների վերահսկման և անհատական պաշտպանական միջոցների կիրառման մեթոդներին:
Դասընթացը նախատեսված էր արդյունաբերության, գյուղատնտեսության, գիտահետազոտական և ուսումնական բնագավառներում իոնացնող ճառագայթման աղբյուր կամ ճառագայթում առաջացնող սարք ներմուծող, արտահանող, արտադրող, օգտագործող, փոխադրող, պահեստավորող կազմակերպություններում կարևոր պաշտոններ զբաղեցնող անձնակազմի համար։
Դասընթացը նվիրված էր հետևյալ թեմաներին՝
- Ճառագայթային պաշտպանության հիմունքներ
- Ռադիացիոն միավորներ և չափումներ
- Իոնացնող ճառագայթման կենսաբանական ազդեցությունը
- Ճառագայթային պաշտպանության միջոցներ
- Ճառագայթային անվտանգության և պաշտպանության հիմնական սկզբունքները
- Ճառագայթահարման տեսակները
- Ռադիոակտիվ աղբյուրներ
- Արտակարգ իրավիճակների պատրաստվածություն և արձագանքում
- Ճառագայթային անվտանգության համակարգը ՀՀ-ում
- Իրավական դաշտ
Դասընթացի ավարտին բոլոր մասնակիցներին տրվեցին ռադիացիոն անվտանգության և ռադիոակտիվ աղբյուրների անվտանգ կիրառման վերաբերյալ գիտելիքների և հմտությունների մակարդակի մասին հավաստագրեր։
Միջուկային և ռադիացիոն անվտանգության կենտրոնը շարունակելու է իրականացնել նմանատիպ ծրագրեր՝ նպաստելով ոլորտի մասնագետների որակավորմանը և Հայաստանում ռադիացիոն անվտանգության ամրապնդմանը։
Այլ նորություններ
ՄՌԱԳ կենտրոնը վնասազերծում է հին տեսակի ծխի տվիչները
