«Աշխատած վառելիքի և ռադիոակտիվ թափոնների կառավարման անվտանգության մասին» համատեղ կոնվենցիան միջազգային իրավական փաստաթուղթ է, որն ապահովում է աշխատած վառելիքի և ռադիոակտիվ թափոնների անվտանգության գլոբալ վերահսկողությունը՝ սկսած նրանց առաջացումից մինչև թաղումը:
Երեք տարին մեկ Կոնվենցիան վավերացրած անդամ պետությունները ներկայացնում են Ազգային Հաշվետվություններ, քննարկում Կոնվենցիայից բխող պարտավորությունների իրականացմանն ու առկա մարտահրավերներին վերաբերող հարցեր: Այս տարվա մարտի 17-ից 28ը Ատոմային էներգիայի միջազգային գործակալությունում տեղի ունեցած հանդիպումներին մասնակցեցին 77 երկրների ավելի քան 1000 պատվիրակ։
Հայաստանի պատվիրակության կազմում էին ՀՀ միջուկային անվտանգության կարգավորման կոմիտեի, Հայկական ատոմային էլեկտրակայանի և Ավստրիայում ՀՀ մշտական ներկայացուցչի գրասենյակի ներկայացուցիչները: ՄՌԱԳ կենտրոնը ակտիվորեն մասնակցում է Հայաստանի Ազգային հաշվետվության մշակմանը, ներկայացված հարցերի քննարկումներին:
ՀՀ կողմից ներկայացված նախորդ Ազգային հաշվետվություններում, որպես առաջնային մարտահրավեր, նշվել է Հայաստանում ռադիոակտիվ թափոնների կառավարման կենտրոնացված կազմակերպության (Ազգային օպերատոր) բացակայությունը։ Ազգային օպերատորը պետք է զբաղվի ՀՀ-ում առկա և առաջացող բոլոր տեսակի ռադիոակտիվ թափոնների երկարաժամկետ կառավարմամբ։ Նշենք, որ ՀՀ ազգային հաշվետվության քննարկումների արդյունքում ՀՀ-ին ուղղվել է ընդհանուր առմամբ 50 հարց, որոնց 70%-ը վերաբերում են ռադիոակտիվ թափոնների և աշխատած միջուկային վառելիքի երկարաժամկետ կառավարմանը, հատկապես՝ Ազգային օպերատորի ստեղծմանը: Հանդիպումների ընթացքում բազմիցս քննարկումներ են ծավալվել «Ազգային օպերատոր»-ի դերի մասին։
Ռադիոակտիվ թափոնների և աշխատած միջուկային վառելիքի երկարաժամկետ կառավարման անվտանգ, ապահով և կայուն համակարգի զարգացման համար հրամայական է Ազգային օպերատորի ինստիտուտի առկայությունը։ Կարևորագույն նպատակներից է ռադիոակտիվ թափոնների ու աշխատած միջուկային վառելիքի հետ կապված խնդիրները ապագա սերունդներին չթողնելը, ինչը Համատեղ Կոնվենցիայի առաջնային պահանջներից մեկն է։
Այլ նորություններ
ՄՌԱԳ կենտրոնը դասընթաց է անցկացրել Թուրքմենստանում
