«Միջուկային անվտանգության համագործակցություն Հայաստանի կարգավորող մարմնի հետ» նախագծի շրջանակներում Երևանում անցկացվեց տեխնիկական աշխատաժողով՝ Միջուկային անվտանգության կարգավորման կոմիտեի, Միջուկային և ռադիացիոն անվտանգության գիտատեխնիկական կենտրոնի, և IDOM Consulting, Engineering, Architecture S.A.U. ընկերության գլխավորած կոնսորցիումի փորձագետների մասնակցությամբ։
Աշխատաժողովի նպատակն էր քննարկել ընթացիկ գործունեության առաջընթացը, ներկայացնել ավարտված աշխատանքների արդյունքները և սահմանել հետագա քայլերը։ Միջոցառման ընթացքում ներկայացվեցին և քննարկվեցին WENRA անվտանգության որոշակի մակարդակների և Եվրատոմի առանցքային դիրեկտիվների՝ Հայաստանյան օրենսդրական և կարգավորող դաշտ ներառման համար մշակված գործողությունների ծրագրերը։
Քննարկվել են Խմելու ջրի (Euratom 2013/51), Հիմնական անվտանգության ստանդարտների (2013/59/Euratom), ինչպես նաև ռադիոակտիվ թափոնների և աշխատած միջուկային վառելիքի տեղափոխման, վերահսկման և հսկողության վերաբերյալ (2006/117/Euratom) դիրեկտիվները։ Աշխատանքներն իրականացվում են ԵՄ–ՀՀ Համապարփակ և ընդլայնված գործընկերության համաձայնագրով (CEPA) ստանձնած պարտավորությունների շրջանակում՝ ազգային օրենսդրությունը ԵՄ համապատասխան պահանջներին մոտարկելու նպատակով։
Բացի այդ, կոնսորցիումը ներկայացրեց անվտանգության հետ կապված փաստաթղթերի վերանայման արդյունքները։ Ներկայացվեցին ու քննարկվեցին նաև սեյսմիկ անվտանգության բարելավման միջոցառումների գնահատումը, ջրածնային պասիվ ավտոկատալիտիկ վերակոմբինատորների ներդրումը և ՀԱԷԿ-ի օպերատորների պատրաստման սիմուլյատորը։ Հայ փորձագետների հետ համատեղ քննարկումները հնարավորություն տվեցին խորքային վերլուծություն կատարել ու պարզաբանել Հայկական ատոմակայանի անվտանգության բարելավման հետ կապված մի շարք խնդիրներ։
Աշխատաժողովը կարևոր նշանակություն ունեցավ ազգային կարգավորող օրենսդրության բարելավման, հայ մասնագետների տեխնիկական փորձագիտության և վերլուծական կարողությունների ընդլայնման, ինչպես նաև Հայաստանի միջուկային և ճառագայթային անվտանգության կարգավորող պահանջները եվրոպական և միջազգային չափանիշներին համապատասխանեցնելու համար։
