Ատոմային էներգիայի միջազգային գործակալության (ԱԷՄԳ) TKM9003 տեխնիկական համագործակցության ծրագրի շրջանակներում Թուրքմենստանի Աշխաբադ քաղաքում իրականացվել է փորձագիտական առաքելություն։ Առաքելության նպատակն էր զարգացնել անհատական դոզիմետրիկ հսկողության և ճառագայթաչափական տրամաչափարկման ծառայությունների տեխնիկական կարողություններն ու որակի կառավարման համակարգերը։
Առաքելությանը որպես ԱԷՄԳ-ի փորձագետ մասնակցել է Միջուկային և ռադիացիոն անվտանգության գիտատեխնիկական կենտրոնի առաջատար մասնագետ Արփի Խաչատրյանը։ Մեկ այլ միջազգային փորձագետի հետ համատեղ նա իրականացրել է տեխնիկական գնահատում և աջակցություն ցուցաբերել Թուրքմենստանի պաշտպանության նախարարության Կենտրոնական ռադիոքիմիական լաբորատորիայի անհատական դոզիմետրիկ հսկողության ծառայությանը։
Մասնավորապես, գնահատվել են լաբորատոր սարքավորումները և աշխատանքային ընթացակարգերը, իրականացվել է ջերմալյումինեսցենտային դոզիմետրիկ համակարգի տրամաչափարկում և աշխատանքային բնութագրերի ստուգում, ինչպես նաև ուսումնասիրվել են որակի ապահովման և վերահսկման գործող մեխանիզմները։ Հատուկ ուշադրություն է դարձվել Harshaw 6600 LITE դոզիմետրիկ համակարգի շահագործմանը, չափումների արդյունքների գնահատմանը, ստանդարտ գործառնական ընթացակարգերի մշակմանը, չափումների գրանցումների և փաստաթղթավորման կատարելագործմանը, ինչպես նաև լաբորատորիայի որակի կառավարման համակարգի հետագա զարգացմանը՝ ISO/IEC 17025 ստանդարտի պահանջներին համապատասխան։
Առաքելության կարևոր բաղադրիչներից էր լաբորատորիայի անձնակազմի գործնական ուսուցումը։ Մասնակիցներն ընդգրկվել են դոզիմետրերի նախապատրաստման, ճառագայթահարման, տրամաչափարկման, չափումների իրականացման և արդյունքների գնահատման աշխատանքներում։ Անդրադարձ է կատարվել նաև անձնակազմի մասնագիտական կարողություններին, որակի կառավարման ընթացակարգերի կիրառմանը և կարողությունների հետագա զարգացման առաջնահերթություններին։
Առաքելության ավարտին ներկայացվել են առաջարկություններ՝ ուղղված լաբորատորիայի տեխնիկական և կազմակերպչական պայմանների բարելավմանը, որակի կառավարման համակարգի ամրապնդմանը և անձնակազմի մասնագիտական պատրաստվածության հետագա կատարելագործմանը։
Առաքելությունը լավ հնարավորություն էր ծանոթանալ միջազգային փորձին և կնպաստի Թուրքմենստանում անհատական դոզիմետրիկ հսկողության կարողությունների ամրապնդմանը։ Այն նաև ընդգծում է Միջուկային և ռադիացիոն անվտանգության գիտատեխնիկական կենտրոնի փորձագետների մասնագիտական բարձր պատրաստվածությունն ու ակտիվ մասնակցությունը ԱԷՄԳ-ի շրջանակներում իրականացվող միջազգային տեխնիկական համագործակցության ծրագրերին։
