Երևանում կայացավ ԵՄ ֆինանսավորմամբ իրականացված INSC/2024/436-156 «Միջուկային անվտանգության կարգավորող համագործակցություն Հայաստանի կարգավորող մարմնի հետ» ծրագրի ամփոփիչ հանդիպումը, որին մասնակցեցին ՀՀ միջուկային անվտանգության կարգավորման կոմիտեի, Միջուկային և ռադիացիոն անվտանգության գիտատեխնիկական կենտրոնի, Հայաստանի Հանրապետության կառավարության, ինչպես նաև ծրագրի միջազգային կոնսորցիումի ներկայացուցիչները։ Կոնսորցիումը ղեկավարել է IDOM consulting ընկերությունը (Իսպանիա)՝ VTT (Ֆինլանդիա), BELV (Բելգիա), Vuje (Սլովակիա) և Բուլղարիայի միջուկային կարգավորող գործակալության փորձագետների ներգրավմամբ։
2024թ․ օգոստոսից մինչև 2026թ․ հունիս իրականացված ծրագրի նպատակն էր աջակցել Հայաստանի միջուկային և ռադիացիոն անվտանգության կարգավորման համակարգի ամրապնդմանը, բարձրացնել կարգավորող փորձաքննության և գնահատման կարողությունները, ինչպես նաև նպաստել ազգային կարգավորող դաշտի ներդաշնակեցմանը Եվրատոմի դիրեկտիվների և Արևմտաեվրոպական միջուկային կարգավորող մարմինների ասոցիացիայի անվտանգության հիմնարար մակարդակների հետ։
Մասնակիցները քննարկեցին իրականացված աշխատանքների արդյունքները, ձեռք բերված փորձը, ծրագրի գործնական օգուտները և մշակված արդյունքների հետագա կիրառման հնարավորությունները կարգավորող գործունեության տարբեր ուղղություններում։ Քննարկումները կազմակերպվել էին ըստ առանձին խնդիրների․ համապատասխան խմբերի ղեկավարները ներկայացրեցին ծրագրի կառավարման, գիտելիքների փոխանցման, հայկական կարգավորող դաշտի ներդաշնակեցման, Հայկական ԱԷԿ-ի անվտանգության հիմնավորող փաստաթղթերի փորձաքննության, ինչպես նաև ռադիոակտիվ թափոնների կառավարման ոլորտներում իրականացված աշխատանքներն ու դրանց արդյունքները։
Ընդգծվեց ծրագրի նշանակալի ներդրումը Հայաստանի կարգավորող ենթակառուցվածքի զարգացման, Կոմիտեի և Կենտրոնի տեխնիկական ու փորձագիտական կարողությունների ամրապնդման, ինչպես նաև միջուկային և ճառագայթային անվտանգության կարգավորման ոլորտում եվրոպական և միջազգային առաջավոր փորձի կիրառման գործում։
Ծրագիրը նպաստել է հայկական կազմակերպությունների և եվրոպական գործընկերների միջև համագործակցության հետագա ամրապնդմանը, ստեղծել ամուր հիմք ազգային կարգավորող համակարգի շարունակական կատարելագործման, ինչպես նաև գործողությունների ծրագրերի արդյունավետ իրականացման համար։
