Հայաստանում ճառագայթային իրավիճակը կայուն է․ Կարեն Հարոյանի հարցազրույցը Սպուտնիկ Արմենիային

«Հայ-իրանական սահմանին տեղադրված նոր կայանը թույլ է տալիս վայրկյանների ճշտությամբ արձանագրել ցանկացած փոփոխություն․ Մերձավոր Արևելքում տիրող լարվածության և Իրանի հրթիռակոծությունների ֆոնին Հայաստանում ռադիացիոն իրավիճակը մնում է կայուն»։

Սպուտնիկ Արմենիայի հետ զրույցում Միջուկային և ռադիացիոն անվտանգության գիտատեխնիկական կենտրոնի ճառագայթային անվտանգության գլխավոր մասնագետ Կարեն Հարոյանը հավաստիացնում է, որ Հանրապետության ողջ տարածքում բոլոր կայաններն իրականացնում են 24-ժամյա հսկողություն։

«Հայաստանում գործում է ճառագայթային մոնիտորինգի ժամանակակից համակարգ՝ բաղկացած 32 կայաններից։ Դրանք հիմնականում տեղակայված են ատոմակայանից 10-12 կմ շառավղով գտնվող բնակավայրերում։ Սակայն, հաշվի առնելով տարածաշրջանային զարգացումները, 2025-ին ևս մեկ կայան տեղադրվել է հայ-իրանական սահմանին»։

Իսրայելի կողմից Իրանի նավթային օբյեկտների վրա հարձակումներից հետո տեղեկություններ կան այդ երկրի տարածքում տեղացած «սև» կամ «թթվային անձրևների» մասին։ ԱՀԿ-ն զգուշացրել է, որ մթնոլորտում թունավոր ածխաջրածինների, ծծմբի օքսիդների և ազոտական միացությունների առկայությունը չափազանց վտանգավոր է մարդկանց համար։ Միջուկային օբյեկտների վրա հարձակումների հետևանքով Իրանին սպառնում է նաև միջուկային ճառագայթման վտանգ։