ՄՌԱԳ կենտրոնը քայլեր է ձեռնարկում միջուկային քրեաբանության զարգացման ուղղությամբ

2025 թ. օգոստոսի 20-22-ը ԱՄՆ Արգոնի Ազգային Լաբորատորիայում (Իլինոյս), կայացավ միջուկային քրեաբանության ոլորտին նվիրված տեխնիկական փորձի փոխանակման միջոցառում։ Քննարկվեցին ռադիոակտիվ աղբյուրների հաշվառման, դաշտային տվյալների հավաքագրման և միջուկային քրեաբանության գրադարանների ձևավորման հետ կապված մի շարք կարևոր հարցեր։ Այսպիսի փորձի փոխանակումը կարևոր քայլ է Հայաստանում միջուկային քրեաբանության կարողությունների զարգացման համար՝ նպաստելով Ազգային միջուկային քրեաբանական գրադարանի ստեղծմանը։

Հայաստանը ներկայացնում էին Միջուկային և ռադիացիոն անվտանգության գիտատեխնիկական կենտրոնի մասնագետներ Արփի Խաչատրյանը, Կարեն Հարոյանը, և ՄՌԱԳԿ ասպիրանտ Անահիտ Պետոյանը։ Վերջինս հանդես եկավ գիտական զեկույցով՝ «Գամմա-սպեկտրոմետրիայի միջոցով ոչ համասեռ շփման նմուշների ճշգրիտ վերլուծության ուղիները» թեմայով։ Զեկույցը անդրադառնում է մեթոդական մարտահրավերներին՝ կապված ոչ համասեռ նմուշների վերլուծության հետ և առաջարկում չափումների ճշգրտությունը բարելավելու մեթոդներ։

Հանդիպումը ներառում էր ինչպես տեսական քննարկումներ, մասնավորապես ՄՌԱԳԿ-ի կողմից մշակված xARIS ծրագրային հարթակի ընդլայնման և ISTC-ի հետ համագործակցության ծրագրի արդյունքների, Արգոնի NNFL ծրագրային միջոցի մասին, այնպես էլ՝ գործնական դասընթացներ, որոնց ընթացքում օգտագործվում էին Արգոնի NNFL գործիքակազմը, դաշտային չափման սարքավորումներն ու գրադարանների հետ տվյալների համադրության մեթոդները։