Միջուկային ենթակառուցվածքները կիբերհարձակումների թիրախ կարող են դառնալ, քանի որ հիմնված են թվային համակարգերի վրա: Հաքերները, կիբերհանցագործները և ահաբեկիչները պոտենցիալ սպառնալիք են ներկայացնում ատոմակայանների անվտանգության համար: Ռիսկերը կարող են առաջանալ նաև հնացած համակարգերից, անբավարար սպասարկումից և անվտանգության ապահովման թույլ մեթոդներից:
Սեպտեմբերի 15-ից 18-ը Երևանում անցկացվեց միջուկային կիբեռանվտանգությանը նվիրված աշխատաժողով, որը կազմակերպվել էր ՀՀ միջուկային անվտանգության կարգավորման կոմիտեի, Միջուկային և ռադիացիոն անվտանգության գիտատեխնիկական կենտրոնի և Ամերիկյան Pacific Northwest ազգային լաբորատորիայի համատեղ ջանքերով։
Աշխատաժողովը համախմբել էր հայաստանյան և միջազգային մասնագետների՝ նպատակ ունենալով բարձրացնել միջուկային ոլորտի կիբեռանվտանգության մակարդակը, խթանել գիտելիքների փոխանակումը և համագործակցությունը՝ ավելի կայուն և անվտանգ միջուկային ենթակառուցվածք ապահովելու համար։
Աշխատաժողովին մասնակցում էին «Հայկական Ատոմային Էլեկտրակայան» ՓԲԸ-ի, «Ռադիոակտիվ թափոնների վնասազերծում» ՓԲԸ-ի, ինչպես նաև ՀՀ ԱԱԾ, ՊՆ և ՊԵԿ ներկայացուցիչները։
Այսպիսի նախաձեռնությունները կարևոր են ոչ միայն տեխնիկական կարողությունների զարգացման համար, այլև տարբեր պետական և մասնավոր կառույցների համակարգված համագործակցությունը խթանելու առումով։ Միջուկային ենթակառուցվածքների կիբեռանվտանգության ապահովումը պահանջում է միասնական մոտեցում, ժամանակակից լուծումներ և շարունակական վերապատրաստում;
Մասնակիցները կշարունակեն փորձի փոխանակումն ու մասնագիտական համագործակցությունը՝ ուղղված ազգային կարողությունների ամրապնդմանը և միջազգային լավագույն փորձի ներդրմանը Հայաստանի միջուկային ոլորտում։
Այլ նորություններ
