Երևանում կայացավ Միջուկային և ռադիացիոն անվտանգության կենտրոնի և Օաք Ռիջի ազգային լաբորատորիայի ( Oak Ridge National Laboratory) կազմակերպած տեխնիկական հանդիպումը։
Հանդիպման նպատակն էր շահառու կողմերին ծանոթացնել բարձր ակտիվությամբ ռադիոակտիվ աղբյուրների հեռացման և «Ռադիոակտիվ թափոնների վնասազերծում» ՓԲԸ-ի պահեստարան տեղափոխման հետ կապված գործընթացի նախապատրաստական աշխատանքներին։
Խորհրդային տարիներից Հայաստանում մնացել են բարձր ակտիվության ռադիոակտիվ աղբյուրներ, որոնք այլևս չեն օգտագործվում։ Տասնամյակներ շարունակ դրանք պահվում են գիտահետազոտական ինստիտուտի բունկերում, սակայն անհրաժեշտություն կա տեղափոխել ապահով պահեստարան։ Հայաստանում չկա նման փորձ։
Առաջին անգամ Ռադիոակտիվ և ռադիացիոն անվտանգության գիտատեխնիկական կենտրոնը մշակել է դրանք բունկերից հանելու և տեղափոխելու ծրագիր՝ անվտանգության ամենաբարձր նորմերի պահպանմամբ։ Կենտրոնն այս հարցով համագործակցում է ԱՄՆ համապատասխան լաբորատորիայի հետ, որոնց փորձագետները հրավիրվել էին Հայաստան՝ ծրագիրը քննարկելու համար։
Նախապատրաստական փուլը ներառում է տեղամասի մանրակրկիտ ստուգումներ, պահանջվող նյութերի և սարքավորումների գնահատում և անվտանգության պլանի մանրամասն մշակում։ Խիստ կարևոր է հեռացման գործընթացում նվազագույնի հասցնել ռիսկերը թե՛ անձնակազմի, և թե՛ շրջակա միջավայրի համար:
Հանդիպմանը մասնակցում էին Ազգային Անվտանգության ծառայության, Ներքին Գործերի նախարարության, ՀԱԷԿ-ի, ՀՀ միջուկային անվտանգության կարգավորման կոմիտեի, «Ռադիոակտիվ թափոնների վնասազերծում» ՓԲԸ-ի ներկայացուցիչներն ու Միջուկային և ռադիացիոն անվտանգության կենտրոնի փորձագետները։
Այս նախաձեռնությունը գլոբալ միջուկային անվտանգության և ռադիոակտիվ նյութերի պատասխանատու կառավարման ապահովման շարունակական ջանքերի մի մասն է: Ե՛վ Հայաստանը, և՛ ԱՄՆ-ն ընդգծել են միջուկային ռիսկերը մեղմելու հարցում միջազգային համագործակցության կարևորությունը։
